Oʻzbekiston va Buyuk Britaniya kompaniyasi Weir Minerals konchilik sanoatidagi hamkorlikni kengaytirish masalalarini muhokama qildi. Muloqotlar davomida ishlab chiqarish samaradorligini oshirish va zamonaviy texnologiyalarni joriy etish imkoniyatlari koʻrib chiqildi.
Muloqotlar Konchilik va geologiya vazirligida boʻlib oʻtdi. Uchrashuv ishtirokchilari orasida vazirning birinchi oʻrinbosari F. Hamidov, Oʻzbekistondagi Britaniya elchisi Timothy Smart, shuningdek, Weir Mineralsning mintaqaviy boshqaruvchi direktori Radjen Govender va kompaniyaning vakillari bor edi.
Tomonlar Oʻzbekiston konchilik sanoatining rivojlanish istiqbollarini batafsil oʻrgandilar, shuningdek, investitsiya rejalarini va xorijiy hamkorlarni jalb qilishdagi potentsial imkoniyatlarni muhokama qildilar.
Bundan tashqari, ishtirokchilar Weir Mineralsning Oʻzbekiston konchilik korxonalari bilan hamkorligini, shu jumladan, ilgʻor texnologik yechimlardan foydalanish, mahsuldorlikni oshirish va operatsion samaradorlikni yaxshilashni muhokama qildilar. Anʼanaviy ishlab chiqarish jarayonlarini taʼminlash uchun innovatsion yondashuvlardan foydalanish boʻyicha fikr almashindi va keyingi oʻzaro aloqa yoʻnalishlari aniqlandi.



