Yangi Toshkentda infratuzilma toʻlovining asosiy stavkasi oʻn baravar kamaytiriladi. Mavjud maʼlumotlarga koʻra, Yangi Toshkentga allaqachon 2 milliard dollardan ortiq investitsiya kiritilgan.
Xususiy sektorni qurilishga jalb qilish surʼatlari mavjud imkoniyatlarga mos kelmayotgani taʼkidlandi. Yangi shahar uchun jami 20 ming gektar yer ajratilgan. Birinchi bosqichda 6 ming gektar hududda 50 milliard dollarlik loyihalar amalga oshirilishi rejalashtirilmoqda.
Yangi aeroport mavjudligi bilan bu hududdagi investitsiya salohiyati 200 milliard dollarga yetishi mumkin. Hozirda ming gektardan ortiq maydonlarda qurilish asosan davlat mablagʻlari hisobidan olib borilayotgan boʻlsa, tadbirkorlarga 94 gektardan ortiq yer ajratilmagan.
Prezident Yangi Toshkent nafaqat uy-joy quriladigan hudud boʻlishi kerakligini taʼkidladi. U zamonaviy biznes, taʼlim, tibbiyot, turizm va xizmatlar sohasini jalb qiluvchi mustaqil iqtisodiy markazga aylanishi lozim.
Mirziyoyev Yangi Toshkent butun mamlakatning barcha tadbirkorlari uchun yangi imkoniyatlar maydoni boʻlishi kerakligini taʼkidladi. Shuningdek, 50 million dollardan yuqori qiymatli har bir loyiha birligiga masʼul muvofiqlashtiruvchi tayinlanishi eʼlon qilindi.