Oʻzbekiston investitsiyalar, sanoat va savdo vazirligi maʼlumot berishicha, sentyabrning 18-ida Vazir maslahatchisi Azizbek Isoyev va China Southern Power Grid Industrial Development Group delegatsiyasi oʻrtasida uchrashuv boʻlib oʻtdi.
Muloqotlar davomida tomonlar Oʻzbekiston hududida zamonaviy avtomobillar uchun zaryadlash stansiyalari tarmogʻini yaratish rejalarini muhokama qilishdi. Ayniqsa, Toshkent–Xorazm yoʻnalishi boʻylab zarur infratuzilmani rivojlantirishga alohida eʼtibor qaratildi.
Ishtirokchilar shuningdek, zaryadlash stansiyalari uskunalarini mahalliy ishlab chiqarish imkoniyatlarini, xizmat koʻrsatish infratuzilmasini rivojlantirish va potentsial investitsion loyihalarni ishga tushirishni koʻrib chiqishdi. Uchrashuv yakunida ikki tomon aniq loyihalarni tayyorlash va amalga oshirish boʻyicha amaliy ishlarni davom ettirishga tayyorligini bildirdi.