IT Park Uzbekistan va Janubiy Koreya kompaniyasi FutureNuri taʼlim texnologiyalari (EdTech) va raqamli yechimlar sohasida oʻzaro tushunish memorandumini tuzdi. Tomonlar shuningdek, FutureNuri ning Oʻzbekiston bozoriga kirib kelish va Markaziy Osiyoda faoliyatini yanada rivojlantirish rejalari haqida muhokama qildi.
IT Park Uzbekistan delegatsiyasi ijrochi direktor Jaxongir Rajabov boshchiligida 2026-yil 10-sentabrda Seulda FutureNuri bosh ijrochi direktori Jon Ho Chu bilan uchrashuv oʻtkazdi.
Muloqotlar davomida FutureNuri ning Oʻzbekistonda roʻyxatdan oʻtishi, ofis ochilishi, IT Park rezidenti maqomini olishi, mahalliy mutaxassislarni jalb qilish va ofis infratuzilmasini tashkil etish kabi jihatlar koʻrib chiqildi. Shuningdek, xalqaro texnologik kompaniyalarga mavjud qoʻllab-quvvatlash choralari ham muhokama qilindi.
Imzolangan memorandum keyingi hamkorlikning asosiy yoʻnalishlarini belgilaydi va EdTech, raqamli kutubxonalar, sunʼiy intellektga asoslangan yechimlar va raqamli transformatsiya sohalarida birgalikdagi tashabbuslar uchun asos yaratadi.
FutureNuri kompaniyasi raqamli kutubxona platformalari, akademik axborot tizimlari va kutubxona jarayonlarini avtomatlashtirish yechimlarini ishlab chiqish va joriy etish bilan shugʻullanadi. Kompaniyaning mahsulotlari universitetlar, davlat va akademik muassasalar, shuningdek, jamoat kutubxonalari kabi taxminan 800 ta tashkilotda qoʻllaniladi.
Bundan tashqari, FutureNuri bilimlarni boshqarish va kutubxona tizimlari uchun sunʼiy intellektga asoslangan yechimlarni ishlab chiqadi. 2026-yil yanvar oyida kompaniya maʼlumotlar va kutubxona xizmatlari bilan ishlashda AI dan foydalanish uchun moʻljallangan futurenuri.ai platformasini ishga tushirdi.
FutureNuri Oʻzbekistonda birinchi xorijiy ofisini ochishga va Markaziy Osiyoda EdTech va raqamli kutubxonalar sohasidagi yangi loyihalarni amalga oshirish imkoniyatlarini oʻrganishga qiziqish bildirdi. Kompaniya mahalliy mutaxassislarni jalb qilish imkoniyatini ham koʻrib chiqmoqda.
IT Park Uzbekistan FutureNuri vakillarini 2026-yil 22-25-sentabrda Toshkentda boʻlib oʻtadigan ICT WEEK Uzbekistan tadbiriga taklif qildi. Ushbu tadbir doirasida kompaniya Oʻzbekistonning texnologik ekotizimini oʻrganishi va mahalliy hamkorlar hamda tashkilotlar bilan aloqalarni oʻrnatishi mumkin.
Natijada, tomonlar FutureNuri ning Oʻzbekiston bozoriga kirib kelishi, mahalliy faoliyatni tashkil etishi va Oʻzbekiston ham, Markaziy Osiyo hamda yangi loyihalarni tayyorlash ustida ishlashni davom ettirish boʻyicha kelishib oldilar.