Toshkentda Jahon bojxona tashkilotining VII Global kinologiya forumining tadbirlari 7-9 sentyabr kunlari oʻtkazilmoqda. Ushbu forumda ellikdan ortiq davlatlar vakillari qatnashmoqda.
Bojxona qoʻmitasi matbuot xizmatining maʼlumotiga koʻra, forum Toshkentda boshlandi. Tadbir uch kun davom etadi. Bu haqida Sputnik Oʻzbekiston korrespondenti xabar berdi.
Forumda Jahon bojxona tashkilotining bosh kotibining Yan Sanders, Bojxona qoʻmitasi raisi Akmalxoʻja Mavlonov hamda 50 dan ortiq davlat bojxona xizmatlari va 15 dan ortiq xalqaro tashkilotlarning delegatlari ishtirok etmoqda.
Uch kun davomida xodimlar xizmatlarini tayyorlash, kinologlar malakasini oshirish, sintezlangan giyohvand moddalarni aniqlash usullari, veterinariy yordamni taʼminlash va kinologiya infratuzilmasini rivojlantirish kabi muhim masalalar muhokama qilinmoqda.
Chexiya, Germaniya va Niderlandiya ekspertlari hid izlarini aniqlash va namuna yigʻish texnologiyalarini taqdim etmoqda. Oʻz navbatida, Kanada, AQSh va Buyuk Britaniya mutaxassislari yangi sintezlangan giyohvand moddalarni aniqlash uchun kinologik usullardan foydalanish tajribasini baham koʻrmoqda.
Forum doirasida ishtirokchilar Oʻzbekiston bojxona milliy markazi faoliyati bilan tanishdilar. Ushbu markaz 1996-yilda tashkil etilgan boʻlib, 2008-yilda Jahon bojxona tashkilotining Hududiy kinologiya markazi maqomini olgan.
Toshkent bu forumni birinchi marta qabul qilmoqda. Avvalgi anjumanlar Belgiya, Rossiya, Argentina, Chexiya, Avstraliya va Hongkonqda oʻtgan.
Forum yakunlangandan soʻng, Jahon bojxona tashkilotining kinologiya boʻyicha Kompendiyasi qabul qilinishi rejalashtirilmoqda.