Oʻzbekiston judo jamoasi Lozanna shahrida boʻlib oʻtgan "Katta dubulga" turnirida beshta medal qoʻlga kiritib, ishtirokini yakunladi. Bu haqda Milliy Olimpiya qoʻmitasi matbuot xizmati maʼlumot berdi.
Musobaqaning yakuniy kunida oʻzbek judoistlari ogʻir vazn toifalari boʻyicha kurashib, bir oltin, bir kumush va bir bronza medalni qoʻlga kiritishdi.
-90 kg vazn toifasida ikki Oʻzbekiston vakili — Umar Bozorov va Nurbek Murtazoyev finalga chiqdi. Hal qiluvchi uchrashuvda Bozorov gʻalabaga erishib, "Katta dubulga" turniri oltin medali egasi boʻldi. Murtazoyev esa kumush medalni qoʻlga kiritdi.
Finalgacha Bozorov Germaniya vakili Lasse Shriver, Rossiya vakili Mansur Lorsanov, Bolgariya vakili Ivaylo Ivanov va Chexiya vakili Adam Kopetskiyni magʻlub etdi. Murtazoyev esa Gruziya vakili Akaki Japaridze, Shveytsariya vakili Simon Gautshi, Braziliya vakili Rafael Macedo va Rossiya vakili Egor Andoni yengdi.
-100 kg vazn toifasida bronza medal Ernazar Sarsenbayev qoʻlga kiritdi. U avval Qozogʻiston vakili Marat Baykamurov va Braziliya vakili Leonardo Gonsalvesni magʻlub etib, yarim finalga chiqdi. Bronza uchun kurashda Sarsenbayev Yaponiya vakili Tettu Hamaduni magʻlub etib, Niderlandiya vakili Simeon Katarinaga imkon berdi.
Avvalroq Arslonbek Tojiyev -81 kg vaznida kumush medalni, Samariddin Qoʻchqorov esa -60 kg vaznida bronza medalni qoʻlga kiritgan edi.
Shunday qilib, Oʻzbekiston jamoasi Lozannadagi "Katta dubulga" turnirini bir oltin, ikki kumush va ikki bronza medal bilan yakunlab, umumiy hisobda oltinchi oʻrinni egalladi. Birinchi oʻrin Rossiya jamoasiga, keyingi oʻrinlar esa Yaponiya va Germaniya jamoalariga tegishli boʻldi.
28-30 avgust oy kunlari oʻtkazilgan musobaqalarda 77 ta mamlakatdan 513 nafar judoist ishtirok etdi.